15-сентябрда Базар-Коргон районунун көчмө соту Ноокен районунда өз өкүмүн угузду. Ага ылайык, 13-июндагы кандуу окуя боюнча сегиз соттолуучу айыптуу деп табылды. Базаркоргондук укук коргоочу Азимжан Аскаров арасында болгон беш соттолуучу өмүр бою эркинен ажыратылып, үй-мүлкү мамлекет пайдасына алынды.
15-сентябрда Базар-Коргон районунун көчмө соту Ноокен районунда өз өкүмүн угузду. Соттун өкүмүнө ылайык, 13-июнда Базар-Коргондо болгон окуя боюнча 8 соттолуучу айыптуу деп табылды. Аталган райондогу укук коргоочу Азимжан Аскаров арасында болгон 5 соттолуучу өмүр бою эркинен ажыратылып, үй-мүлкү мамлекет пайдасына алына турган болду.
Ноокен районундагы Чек айылына көчүп кеткен жарандардын үйлөрү жарымы курулган бойдон бүтпөй турат. Алар курулуш материалдары менен насыя акчага муктаж болууда. Учурда чатырда күн көргөн баш калкасыз тургундар өкмөттөн бериле турган насыя акча кечиккендиктен суук түшсө “кайда жашайбыз?” деп санааркашат.
Жактоочу Абдумиталип Абдулакимов Базар-Коргондо июнь айында болгон кандуу окуя боюнча айыпталып жаткан укук коргоочу Азимжан Аскаровго өмүр бою эркинен ажыратуу сураган мамлекеттик айыптоочунун сунушу менен макул эмес. Жактоочунун пикиринде, Базар-Коргондогу “Аба” аттуу укук коргоо уюмунун башчысы А. Аскаровго коюлган айыптар сотто далилденген жок.
Июнь айында Базар-Коргондо болгон кандуу окуялар боюнча сот иши уланууда. Кечээки сотто мамлекеттик айыптоочу укук коргоочу Азимжан Аскаровду өмүр бою эркинен ажыратууну сурады. Азимжан Аскаров болсо тагылган айыптарга макул эместигин айтып, аны куру доомат деп эсептөөдө.
Бүгүн да Базар-Коргон райондук көчмө соту өз ишин улантууда. Сот жараяны өтүп жаткан Ноокен районунун имаратында 7-сентябрда июнь айындагы кыргыз-өзбек чек арасындагы окуя да талкууланды. 12-июндагы жол тосуу жана чек арадагы район акимин барымтага алуу айыптарын укук коргоочу Азимжан Аскаров четке кагууда.
6-сентябрда Базар-Коргон райондук көчмө сот өз ишин Ноокен районунда жүргүздү. Анда арасында укук коргоочу Азимжан Аскаров болгон 8 киши сурак беришти. Эки соттолуучудан башкасы өз айыптарын четке кагышты. Сот иши бүгүн да уланууда
Жалал-Абад облусунда аралаш тилде окуткан 64 мектеп бар. Алардын бири – Жалал-Абад шаарындагы өзбек жана орус тилдеринде окуткан Алим Усман атындагы орто мектеп. Бүтүндөй өзбек мектептериндей эле аталган мектепте да китептер жетишсиз. Кыргызстандан чыккан китептер жетишпегенинен улам балдар совет доорунда жана Өзбекстандан чыгарылган китептерди окууга аргасыз.
Ноокен райондук сотунда арасында адам укугун коргоочу Азимжан Аскаров болгон сегиз адамдын кылмыш ишин кароо 6-сентябрда улантыла турган болду. Базар-Коргондо 13-июнда болгон кандуу окуя боюнча айып тагылгандардын сот иши кечээ башталды.
29- августта жүз чакты киши Ноокен райондук бийлигинин алдында митинг өткөрүштү. Алар райондук кеңештин 80 пайыз депутаты макул болбогон адамдын райондун акимдигине дайындалышына каршы чыгышты. Жергиликтүү бийлик башчысын элдин каалоосу менен шайлоону талап кылышып, бийлик алдына 3-сентябрга дейре мөөнөт коюшту. Бул аралыкта маселе чечилбей турган болсо, Ноокен районунда ошо күнү аким шайлоо курултайы өтө турган болду.
Аймакта сырт жактарга кеткендердин агымы азайбай жатат. Адамдарды жашаган жерин которууга эртеңки күнгө ишенимдин жоктугу жана жашоонун начардыгы мажбурлоодо.
Билим берүү министрлиги жапкан Жалал-Абаддагы “Эл достугу” университетинин студенттери окуусун кайда барып улантаарын билбей, баштары маң.
Жалал-Абад облусунда өткөн айлардагы капсалаңда жапа чеккендер үчүн үй-жай курулууда. Бирок эмгиче үй курулушу баштала элек жабырлануучулар суук жакындаган сайын тынчсызданууда.
13-августта Жалал-Абадда өткөн талкууда президент Р.Отунбаева менен ЕККУнун Кыргызстандагы элчиси Эндрью Тесорьердин наамына кайрылуу кабыл алынды. Жыйында көпчүлүк ЕККУнун полиция кеңешчилерин өлкөгө киргизүүгө каршы болду.
Президент Роза Отунбаева 12- августта Жалал-Абад облусунда болгон иш сапарынын учурунда облустун билим берүү тармагынын башчылары менен да жолугушту. Жолугушууда ал облустун мектептери китеп менен 52 пайыз гана камсыздалганын билдирди. Облустагы шаар- райондордун билим берүү башчылары мугалимдер менен мектеп жабдууларынын тартыш, айлык акынын аз болгон маселесин көтөрүштү. Вице- премьер Өктөмхан Абдуллаева Базар-Коргон районундагы ата- энелер кооптонуп турушкандыктан окуучуларды мектепке автоунаалар менен ташуу маселесин козгоду.
Жалал-Абад облусунда июндагы коогалаңда үйлөрү өрттөнгөн тургундар жаңы турак-жайды куруу иштеринин кечеңдегенине кабатыр болушууда. Турак-жайсыз адамдар курулуш башталбаганынан улам “күз-кыш айларында кайда жан сактайбыз” деп санааркашууда.
Жалал-Абад облусунда июнь айындагы кандуу окуяларга байланыштуу милициянын полковник ардагери менен мурдагы колхоздун башкармасы кармалды. Алар бир канча адам өлтүрүүгө катышкан жана кишилерди барымтага алган деп шектелүүдө.
Жалал-Абад шаары менен Сузак районунда базар, мекеме-уюмдар иштегени менен эл кооптонуу сезиминен арыла элек. Облуста май-июнь айларында болгон тополоңдон калган жарааттын карттары көпкө барып айыгат шекилдүү. Адистердин болжолунда, Кыргызстанда тынчтыкты сактап калуу үчүн күзгө белгиленген парламенттик шайлоону таза өткөрүү зарыл.
Мурдагы президенттин иниси Акмат Бакиевдин кармалышы боюнча Жалал-Абад коомчулугунда ар кыл пикирлер айтылууда. Облус прокуратурасы анын апрель айынан берки окуяларга түздөн-түз катыштыгы бар экенин белгилөөдө.
Жалал-Абадда жүргөн ички иштер министринин орун басары Мелис Турганбаев мурдагы президенттин иниси Акмат Бакиев кантип кармалганын "Азаттыкка" айтып берди. Ал ошондой эле калган Бакиевдерди кармоо боюнча да издөө иштери уланып жатканын, аларды кармоого күч жетээрин билдирди.
Дагы жүктөңүз
